ദൈവത്തിനോട് പരാതി പറയും മുമ്പേ… Before you make a complaint to God…

ദൈവത്തിനോട് പരാതി പറയും മുമ്പേ…

Picture Credit: nhs.com/Google

1. പാർക്കുവാൻ ഒരു വീടും, ആഹാരം സൂക്ഷിക്കാന്‍ ഫ്രിഡ്ജും നിങ്ങള്‍ക്ക് ഉണ്ടോ എങ്കില്‍ നിങ്ങള്‍ ഈ ലോകത്തെ ധനികരില്‍ ഒരാളാണ്.

2. നിങ്ങള്‍ക്ക് ബാങ്കില്‍ പണമുണ്ടോ, പോക്കറ്റില്‍ പണമുണ്ടോ, എങ്കില്‍ നിങ്ങള്‍ ഈ ലോകത്തെ എട്ടുശതമാനം ധനികരില്‍ ഒരാളാണ്.

3. രാവിലെ ഉണര്‍ന്ന്, ക്ഷീണത്തെ ഗണിക്കാതെ ജോലിചെയ്യാന്‍ നിങ്ങള്‍ക്ക് കഴിവുണ്ടോ എങ്കിൽ  നിങ്ങള്‍  വീണ്ടും ഭാഗ്യവാന്മാരുടെ പട്ടികയിൽ തന്നെ. ഇങ്ങനെ സാധിക്കാത്ത കോടിക്കണക്കിന് ജനങ്ങള്‍ ഇവിടെയുണ്ട്.

4. യുദ്ധക്കെടുതി അറിഞ്ഞിട്ടില്ലെങ്കില്‍, തടവും പട്ടിണിയും ഭീകരരുടെ വിളയാട്ടവും അനുഭവിച്ചില്ലെങ്കില്‍ നിങ്ങള്‍ മഹാഭാഗ്യവാന്മാര്‍. ഏകദേശം 5000 ലക്ഷം പേരാണ് ഈ ദുരന്തങ്ങള്‍ സദാ അനുഭവിച്ചുകൊണ്ടിരിക്കുന്നത്.

5. മരണഭയമില്ലാതെ ദേവാലയത്തില്‍ പോകാന്‍ കഴിയുന്നുണ്ടോ, എങ്കില്‍ ഭാഗ്യം, അതിന് സാധിക്കാത്ത 300 കോടി നിര്‍ഭാഗ്യവന്മാര്‍ ഇപ്പോള്‍ ഈ ഭൂമിയിലുണ്ട്.

6. മന്ദഹാസത്തോടെ ഈ ജീവിതഭാഗ്യം തന്ന ദൈവത്തിന് നന്ദിയും പറഞ്ഞ് നിങ്ങള്‍ ജീവിക്കുന്നെങ്കില്‍, നിങ്ങള്‍ ഭാഗ്യവാന്മാര്‍, കാരണം ഭൂരിഭാഗം ജനങ്ങളും ഈ നന്ദി പ്രകടിപ്പിക്കാറില്ല.

7. ഇന്നലെയും  ഇന്നും നിങ്ങള്‍ പ്രാര്‍ത്ഥിച്ചുവോ. ദൈവത്തിന്റെ നിര്‍ദ്ദേശങ്ങള്‍ക്കായി കാതോര്‍ത്തുവോ? എങ്കില്‍ നിങ്ങള്‍ ഭാഗ്യവാന്മാര്‍ വളരെ ചുരുക്കം ചിലരെ ഇതൊക്കെ ചെയ്യാറുള്ളു.

എന്താണ് നമ്മുടെ പ്രയാസങ്ങൾ പ്രശ്നങ്ങൾ..?

അയൽ വാസിയെക്കാൾ നല്ല വീട് , 

സുഹൃതിനേക്കാൾ നല്ല വാഹനം , 

മക്കളുടെ വിവാഹം, 

ജോലിയിൽ പ്രമോഷൻ, 

കിട്ടുന്ന ശമ്പളത്തിൽ വർദ്ധന  അങ്ങനെ, അങ്ങനെ പോകുന്നു നമ്മുടെ പ്രശ്നങ്ങൾ. അപ്പോഴും നാം നമ്മൾ അനുഭവിക്കുന്ന സുഖ സൌകര്യങ്ങൾ ഓർക്കാതെയും  പോകുന്നു..!

ഈ സന്ദേശം നിങ്ങള്‍ വായിച്ചുവോ. എങ്കില്‍ നിങ്ങള്‍ മഹാഭാഗ്യവാന്മാര്‍, ലോകത്ത് 200 കോടി ജനങ്ങള്‍ക്ക്  വായിക്കാനും പരാതി പറയാനും അറിയില്ല.

Picture Credit: biblestudyonline.org

ഇനി ദൈവത്തോട് പരാതി പറയുമ്പോള്‍ നിങ്ങളുടെ ഈ ഭാഗ്യം  ഒന്നുകൂടി ഓര്‍മ്മിക്കണേ. 

നമുക്കില്ലാത്തതിനെ കുറിച്ചല്ല, ഇതേവരെ ലഭിച്ചുകൊണ്ടിരിക്കുന്ന മഹാഭാഗ്യങ്ങള്‍ക്കുവേണം ദൈവത്തോട് നന്ദി പറയാന്‍. 

ഒരു നേരത്തെ ആഹാരത്തിനായി വിലപിക്കുന്നവനും ഐസ്ക്രീമിനായി നിലവിളിക്കുന്നവനും തമ്മില്‍ വ്യത്യാസമില്ലേ? 

ഈ സന്ദേശം വായിച്ച നിങ്ങൾക്ക് നന്ദി.

ഇത് നിങ്ങൾക്ക് പ്രയോജനപ്പെട്ടു എങ്കിൽ മറ്റുള്ള നിങ്ങളുടെ ബന്ധു മിത്രാദികളോടും ഈ കുറിപ്പിനെപ്പറ്റി പറയുവാൻ മടിക്കില്ലല്ലോ,  

നിങ്ങളുടെ സോഷ്യൽ സൈറ്റുകളിൽ ഇതിൻറെ ലിങ്ക് ചേർക്കുവാൻ മറക്കില്ലല്ലോ 

നല്ലൊരു പ്രഭാതം കാംക്ഷിക്കുന്നു.

ഒപ്പം സൌഭാഗ്യപൂർണ്ണ മായ ഒരു ജീവിതം ഉണ്ടാകട്ടെ എന്ന് ആശംസിക്കുകയും ചെയ്യുന്നു.

നിങ്ങളുടെ ഈ വരവിനും വായനക്കും ഷെയർ ചെയ്യുന്നതിനും നന്ദി നമസ്കാരം


ഈ കുറിപ്പിൻറെ ഒരു ഇംഗ്ലീഷ് പതിപ്പ് വായിക്കുവാൻ താഴെയുള്ള ലിങ്കിൽ അമർത്തുക 

BEFORE YOU MAKE A COMPLAINT. 





Source: Jomon Yacob

Read More

ഒരു വയസ്സ് തികഞ്ഞു ഈ ബ്ലോഗിന് - First Anniversary of Ariel's Jottings

ഈ ബാനർ തയ്യാറാക്കിയത് ശ്രീ  എം. വസന്ത് കുമാർ (M. Vasanth Kumar)

2012 ജൂണ്‍ മാസം എട്ടിന് ഈ പേജിൽ പ്രത്യക്ഷപ്പെട്ട ആദ്യ പോസ്റ്റ്‌.  ഒരു വയസ്സ് തികഞ്ഞു ഈ ബ്ലോഗിന്. 

പുറകോട്ടു തിരിഞ്ഞു നോക്കുമ്പോൾ എടുത്തു പറവാൻ നിരവധി 
കാര്യങ്ങൾ പക്ഷെ, സ്ഥലപരിമിതിയും, സമയ ദൗർലഭ്യവും വാക്കുകൾ ചുരുക്കുവാൻ എന്നെ നിർബന്ധിതനാക്കുന്നു.
എങ്കിലും ചിലതു കുറിക്കാതിരിക്കുവാനും കഴിയുന്നില്ല.  

എന്റെ കഴിഞ്ഞ ഒരു പോസ്റ്റിൽ പറഞ്ഞതു പോലെ,
"നന്ദി ചൊല്ലീടാൻ വാക്കുകൾ പോരാ, 
എങ്കിലും ചൊല്ലീടുന്നു ഹൃദയം നിറഞ്ഞീ വാക്കുകൾ:

Pic. Credit: sxc.hu

"കഴിഞ്ഞ ഒരുവർഷക്കാലം നിങ്ങൾ തന്ന ഈ പ്രോത്സാഹനത്തിനും മനം കുളിർപ്പിക്കുന്ന വാക്കുകൾക്കും ഞങ്ങളുടെ ഹൃദയം നിറഞ്ഞ നന്ദി ഇവിടെ രേഖപ്പെടുത്തുന്നു. 

നന്ദി അറിയിപ്പാൻ നിരവധിപ്പേർ ഉണ്ടെങ്കിലും ഒരിക്കലും മറക്കുവാൻ കഴിയാത്ത ഒരാളത്രേ കൈത്തിരി, ഗാനാമൃതം തുടങ്ങി നിരവധി മലയാളം ഇംഗ്ലീഷ് ബ്ലോഗുകളുടെ സാരഥിയായ ശ്രീ റിജോയ് പൂമല. എന്റെ ബ്ലോഗുകളുടെ രൂപീകരണത്തിന് അദ്ദേഹം വഹിച്ച പങ്ക് ഇത്തരുണത്തിൽ പ്രത്യേകം പ്രസ്താവ്യമത്രേ. നന്ദി ശ്രീ റിജോയ് എല്ലാ സഹകരണത്തിനും.


ഒടുവിൽ ഒരു വാക്കു കൂടി 

ഈ ബ്ലോഗിനെപ്പറ്റി  ബ്ലോഗ്‌ അവലോകനം വാരിക ഇരിപ്പിടം കുറിച്ച വരികൾ ഇതിനകം  കാണാത്ത മിത്രങ്ങൾക്കായി വീണ്ടും അതിന്റെ ലിങ്കിവിടെ ചേർക്കുന്നു. ബൂലോകത്തിലെ ഏരിയല്‍ കാഴ്ചകള്‍  

Pic. Credit: sxc.hu

ആ അവലോകനം തയ്യാറാക്കിയ പ്രശസ്ത ബ്ലോഗറും ഊർക്കടവ് ബ്ലോഗിന്റെ ഉടമയുമായ ശ്രീ ഫൈസൽ ബാബുവിനോടും, ഇരിപ്പിടം വാരിക സാരഥികളോടും ഉള്ള എന്റെ അകൈതവമായ സ്നേഹവും നന്ദിയും ഇവിടെ അറിയിക്കുന്നു.





സസ്നേഹം 
നിങ്ങളുടെ സ്വന്തം 
ഫിലിപ്പ് ഏരിയൽ വറുഗീസും 
സഹപ്രവർത്തകരും 




കടപ്പാട്
Philipscom 
ഇരിപ്പിടം 

web counter

Read More

The Phoenix: Say Thank You.. :-) നമുക്ക് നന്ദിയുള്ളവരായിരിക്കാം!

നന്ദി ചൊല്ലീടാൻ വാക്കുകൾ പോരാ
എന്നു ചിലപ്പോഴെങ്കിലും തോന്നീട്ടുണ്ടോ ?
എന്റെ ജീവിതത്തിൽ അത്തരം സന്ദർഭങ്ങൾ നിരവധി!
നന്ദി ചൊല്ലുക, അതർഹിക്കുന്ന ഏവർക്കും നിർലോഭം.
മടി കാട്ടീടെണ്ട തെല്ലും, ചൊല്ലുക അതർഹിക്കുന്നവർക്ക്.

ഇന്ന് പ്രഭാതത്തിൽ വായിച്ച സുഹൃത്തിന്റെ ബ്ലോഗിൽ
ഇന്നു നഷ്ടമായിക്കൊണ്ടിരിക്കുന്ന ഈ നന്ദിയെന്ന
പദത്തെക്കുറിച്ച് ചിന്തനീയവും പ്രാവർത്തികവുമാക്കേണ്ട
ചില വരികൾ വളരെ രസകരസമായി കുറിച്ചിരിക്കുന്നു.
ഈ കുറിപ്പ്, നന്ദി പ്രകടിപ്പിക്കാൻ ഏവർക്കും
ഒരു  പ്രചോദനമേകും എന്നതിൽ സംശയം വേണ്ട.

സുഹൃത്തേ, സംഗീതേ,എന്റെ പോസ്റ്റു മൂലം ഈ 
കുറിപ്പിവിടെത്താൻ വൈകിയതിൽ ഖേദമുണ്ട് കേട്ടോ!
എന്നിരുന്നാലും ഈ കുറിപ്പ്  ഈയുള്ളവനെ
തൊട്ടു തുടങ്ങിയതിൽ ഒപ്പം, പെരുത്ത സന്തോഷവും തോന്നി.
ഒപ്പം പറയുവാൻ വിട്ടു പോയ നന്ദിയും ചൊല്ലീടുന്നു കേട്ടോ!



വാൽക്കഷണം:
നമുക്ക് നന്ദിയുള്ളവരായിരിക്കാം!
നമുക്കു ചുറ്റും നാമിടപെടുന്നവരോടും
നമ്മോടിടപെടുന്നവരോടും പ്രകടിപ്പിക്കാം 
നന്ദി വാക്കുകൾ. അതവർ മനം കുളിർപ്പിക്കും 
എന്നതിൽ വേണ്ട തെല്ലുമേ സംശയം.

ഏവർക്കും ഒരു നല്ല ദിനം കാംഷിക്കുന്നു.

സുഹൃത്തിന്റെ ബ്ലോഗിലെത്താൻ

താഴെയുള്ള  ലിങ്കിൽ അമർത്തുക

The Phoenix: Say Thank You.. :-): 

നല്ലതെന്തെങ്കിലും പറയാന്‍ ആളുകള്‍ക്ക് മടിയാണ്, അതുപോലെ തന്നെ നല്ല ചിന്തകള്‍ പങ്കുവെക്കുമ്പോള്‍ വാക്കുകള്‍ അടുക്കി വെക്കാന്‍ പ്രയാസവുമാണ്. ഈ...

web counter

Read More

A Thank You Note and a bit of memories: "കടന്നു വന്ന/പോയ വഴികള്‍: ഈ ശുഭദിനത്തില്‍ (June 22) പിന്നിലേക്കൊരു ചെറിയ തിരിഞ്ഞു നോട്ടം"

കടന്നു വന്ന/പോയ വഴികള്‍: ഈ ശുഭദിനത്തില്‍ (June 22) പിന്നിലേക്കൊരു ചെറിയ തിരിഞ്ഞു നോട്ടം:  A Thank You  Note and a bit of memories

വെബ്‌ ലോകത്തേക്ക്  ആദ്യമായി ഇംഗ്ലീഷു  ഭാഷയിലൂടെ കടന്നു വന്ന് പലയിടങ്ങളിലും നടന്നു നടന്നു ഒടുവില്‍ മലയാള നാട്ടില്‍, അല്ല മലയാള വെബ്‌ ഉലകത്തില്‍ വന്നു നില്‍ക്കാന്‍ കഴിഞ്ഞതില്‍ അതിയായ സംതൃപ്തി തോന്നുന്നു ഇപ്പോള്‍. കാരണം സ്വന്തം ഭാഷ കൈകാര്യം  ചെയ്യുന്നത് പോലെ മറ്റൊരു ഭാഷ പഠിച്ചെടുത്തു കൈകാര്യം ചെയ്യുമ്പോള്‍ പാകപ്പിഴകള്‍ ധാരാളം കടന്നു കൂടാന്‍ വഴിയുണ്ടല്ലോ. എന്നാല്‍ മാതൃ ഭാഷയിലാകുമ്പോള്‍ അത് തീര്‍ച്ചയായും കുറേക്കൂടി  സുഗമമായി തന്നെ കൈകാര്യം ചെയ്യാം എന്ന ആത്മ വിശ്വാസം എന്നെ ഇവിടെത്തന്നെ പിടിച്ചു നിര്‍ത്തി.

ഇടയില്‍ ഒരല്പം ബാല്യകാല കഥ കൂടി കുറിക്കട്ടെ !

ബാല്യകാലം മുതലുള്ള വായനാ ശീലം അറിയപ്പെടുന്ന ഒരു എഴുത്തുകാരനായി തീരണം എന്ന ആശയിലെക്കെന്നെ 

നയിച്ചുകൊണ്ടേയിരുന്നു. പേരുകേട്ട മലയാളം എഴുത്തുകാരുടെ കഥ നോവല്‍ പുസ്തകങ്ങള്‍ മാതാപിതാക്കളുടെ ദൃഷ്ടിയില്‍ പെടാതെ കൊണ്ട് നടന്നു വായിക്കുമായിരുന്നു, ഞങ്ങളുടെ നാട്ടിലെ അന്നത്തെ ഏക വായനശാലയായിരുന്ന മഹാത്മാ ഗാന്ധി സ്മാരക ഗ്രന്ഥശാല, അവിടെ അംഗം ആകുന്നതിനും പുസ്തകങ്ങള്‍ കടമെടുത്തു വായിക്കുന്നതിനും എനിക്കു സാധിച്ചു, എന്തിനധികം പരീക്ഷാ കാലങ്ങളില്‍പ്പോലും കഥ പുസ്തകങ്ങള്‍ എന്റെ പുസ്തകങ്ങള്‍ക്കിടയില്‍ ഒളിച്ചു വെച്ച് വായിക്കുമായിരുന്നു ഞാന്‍. എന്റെ വല്യമ്മ (അമ്മയുടെ അമ്മ) ഒരു നല്ല വായനക്കാരി ആയിരുന്നു അവരുടെ പക്കല്‍ ഒരു നല്ല കൂട്ടം പുസ്തകങ്ങള്‍ ഉണ്ടായിരുന്നു, അവയില്‍ മിക്കതും ക്രൈസ്തവ  സഭാ സംബന്ധമായ വിഷയങ്ങള്‍ ഉള്‍ക്കൊണ്ടവ ആയിരുന്നു. അവയില്‍ പലതും കുട്ടികള്‍ക്കായുള്ളവയും ഉണ്ടായിരുന്നു അവ ഞാന്‍ പ്രത്യേകം തിരഞ്ഞെടുത്തു വായിച്ചിരുന്നു.

ജീവിതത്തിലെ വൈഷമ്യമേറിയ പല ചുറ്റുപാടുകളിലൂടെ കടന്നു പോയപ്പോഴും ഈ വായനാ സപര്യ എനിക്കു എന്തോ ഒരു തരം ഉത്തേജനം പകര്‍ന്നു തരുന്നതുപോലെ തോന്നി. അതെന്നെ തുടര്‍ന്നും വായിക്കാന്‍ പ്രേരിപ്പിച്ചു.  അങ്ങനെ വായനക്ക് അമിത പ്രാധാന്യം നല്‍കി കൈയ്യില്‍ കിട്ടുന്നതെന്തും വായിക്കാന്‍ തുടങ്ങി. മറുനാട്ടില്‍ ജോലി ചെയ്യുന്ന ജേഷ്ഠ സഹോദരി (എന്റെ വായനാ കമ്പം ശരിക്കും മനസ്സിലാക്കിയിരുന്നതിനാല്‍) അവധിക്കു നാട്ടില്‍ വരുമ്പോള്‍ അന്നുണ്ടായിരുന്ന Illustrated Weekly, Readers Digest, Hindu ദിനപ്പത്രം തുടങ്ങിയവ എനിക്കായി പ്രത്യേകം കൊണ്ടുവരുമായിരുന്നു, അവ ഒരു നിധിയായി ഞാന്‍ സൂക്ഷിച്ചു വച്ച് വായിക്കുമായിരുന്നു ആ പ്രായത്തില്‍ ഒന്നും മനസ്സിലായില്ലെങ്കില്‍പ്പോലും ഒരു രസത്തിനു ഞാന്‍ അത് ഉച്ചത്തില്‍ വായിക്കുമായിരുന്നു.  ആ വാരികകളും മാസികകളും ഏല്‍പ്പിച്ച ശേഷം ചേച്ചി പറയുമായിരുന്നു, തുടക്കത്തില്‍ ഒന്നും മനസ്സിലായില്ലന്നു വരാം പക്ഷെ വായന നിര്‍ത്തരുത് ഒപ്പം  വേദപുസ്തകത്തിന്റെ (New Testament)  ഒരു ഇംഗ്ലീഷ് പതിപ്പ് തന്ന ശേഷം പറഞ്ഞു ഇതും വായിക്കുക ഓരോ അദ്ധ്യായം വായിക്കുമ്പോഴും ഇംഗ്ലീഷില്‍ നിന്നും ഒരു വാക്യം വായിച്ചു അതിന്റെ മലയാള പരിഭാഷ മലയാളം പുതിയ നിയമത്തിലും നോക്കുക അങ്ങനെ വായിച്ചു പഠിച്ചാല്‍ ഇംഗ്ലീഷും വശമാകും ആ പ്രക്രീയ ഞാന്‍ കുറേക്കാലം തുടര്‍ന്നു, സത്യത്തില്‍ അതെന്റെ ഇംഗ്ലീഷ് പഠനത്തിനൊരു വഴികാട്ടി ആയി എന്ന് പറഞ്ഞാല്‍ അതില്‍ ഒട്ടും അതിശയോക്തിയില്ല. ഇംഗ്ലീഷു പഠിക്കാന്‍ കൊതിക്കുന്ന എന്റെ മലയാളം വായനക്കാരോടും എനിക്കു പറയാനുള്ളതും ഇതു മാത്രം.  ഇതൊന്നു പരീക്ഷിച്ചു നോക്കികൂടെ! ഇവിടെ ഒരു കാര്യം സൂചിപ്പിക്കാനുള്ളത് അതിനു പുതിയനിയമം തന്നെ വേണമെന്നില്ല പകരം ഇംഗ്ലീഷിലും മലയാളത്തിലും ഉള്ള മറ്റേതെങ്കിലും ആധികാരികമായ ഗ്രന്ഥം ഇതിനായി ഉപയോഗിക്കാം, എന്നാല്‍ കൂടുതല്‍ ലഭ്യമായതും ശരിയായ ഭാഷന്തരവും പുതിയനിയമം തന്നെ.  ഇതു നിങ്ങളുടെ ചോയിസ്സിനു വിടുന്നു.  ഇവിടെ ഞാനല്‍പ്പം കാട് കയറിയോ എന്നൊരു സംശയം, പറഞ്ഞു വന്നതിലേക്ക് തന്നെ മടങ്ങട്ടെ!

വായനക്കൊപ്പം പഠനം തുടര്‍ന്ന ഞാന്‍ ഒരുവിധം  പത്താം തരം പൂര്‍ത്തിയാക്കി. പഠിപ്പില്‍ വലിയ മിടുക്കൊന്നും കാട്ടാന്‍ കഴിഞ്ഞില്ല എന്ന്  വേദനയോടെ ഇന്നു ഓര്‍ക്കുന്നു. ഇനി എന്ത് എന്ന ഒരു വലിയ ചോദ്യ ചിഹ്നം മുന്നിലവശേഷിച്ചു. ജേഷ്ഠ സഹോദരന്റെയും ചേച്ചിയുടെയും സഹായ വാഗ്ദാനം തുടര്‍ന്നുള്ള പഠനത്തിനു പിന്‍ബലമേകി, അങ്ങനെ ഞങ്ങളുടെ നാട്ടിലെ ഏറ്റവും നല്ല കോളേജുകളില്‍ ഒന്നായ എടത്വാ സെന്റ്‌ അലോഷ്യസ് കോളേജില്‍ തന്നെ പ്രീ ഡിഗ്രീ പഠനം പൂര്‍ത്തിയാക്കാന്‍ സംഗതിയായി.  അപ്പോഴെല്ലാം  ഇനിയും എഴുതണം, നല്ലൊരു എഴുത്തുകാരന്‍ ആകണം എന്ന മോഹം എന്റെ  ഉള്ളിന്റെ ഉള്ളില്‍ വളര്‍ന്നു കൊണ്ടേയിരുന്നു.   ആ ആഗ്രഹം അങ്ങനെ താലോലിച്ചു കൊണ്ട് നടക്കാന്‍ മാത്രമേ എനിക്കു കഴിഞ്ഞുള്ളൂ.  കാരണം നിനച്ചിരിക്കാത്ത നേരത്ത് സംഭവിക്കുന്നവയെപ്പറ്റി എന്ത് പറയാന്‍. അതുവരെ പുലര്‍ത്തിയ/പരിപാലിച്ച പിതാവ് പക്ഷപാതം പിടിപെട്ടു കിടപ്പിലായതോടെ ഭാവി തന്നേ ഇരുളടഞ്ഞു പോയോ എന്ന് തോന്നിത്തുടങ്ങി. ചില അലോപ്പതി വൈദ്യ ചികിത്സ പിതാവിന് നല്‍കിയെങ്കിലും കാര്യമായ മാറ്റം ഒന്നും കാണാഞ്ഞതിനാല്‍ നാട്ടിലെ പേരെടുത്ത ആയ്യുര്‍വേദ വിദഗ്ദന്‍ മാണത്താറ വിശ്വനാഥന്‍ ഡോക്ടറുടെ ചികിത്സ തുടങ്ങി ഏതാണ്ട് ആറു മാസത്തിനുള്ളില്‍ പിതാവിന് പരസഹായം കൂടാതെ നടക്കുവാനുള്ള ശേഷി തിരിച്ചു കിട്ടി. പിന്നീട് താന്‍ ഏകദേശം മൂന്ന് വര്‍ഷം വലിയ പ്രയാസങ്ങള്‍ ഒന്നും ഇല്ലാതെ ജീവിച്ചു. പിന്നീടുണ്ടായ ഒരു ഹൃദയാഘാദത്തില്‍ താന്‍ ഇഹലോക വാസം വെടിഞ്ഞു. 

തുടര്‍ന്നു ചില മാസങ്ങള്‍ക്ക് ശേഷം പഞ്ചസ്സാര ഫാക്ടറിയില്‍ പിതാവിനുണ്ടായിരുന്ന ജോലി അനുജന് ലഭിച്ചു (അവന്‍ പഠിച്ച ഐ. ടി. ഐ. ട്രേഡിന്റെ അടിസ്ഥാനത്തില്‍). 

തുടര്‍ന്ന് എനിക്കും ഒരു ജോലി ആവശ്യം എന്ന ചിന്ത എന്നെ ഭരിക്കുവാന്‍ തുടങ്ങി, അതെന്നെ ജനിച്ചു വളര്‍ന്ന നാട് വിടാന്‍ ആ ചിന്ത പ്രേരകമാക്കി.  

അങ്ങനെ ജോലി തേടി മൂത്ത ചേച്ചിയും(നേരത്തെ സൂചിപ്പിച്ച ജേഷ്ഠ സഹോദരി) അളിയനും താമസിക്കുന്ന ഹൈദ്രബാദു  പട്ടണത്തിലേക്ക് വണ്ടി കയറി.

അന്ത്രാപ്രദേശിലെ ഇരട്ടനഗരത്തില്‍ വന്ന് താവളം ഉറപ്പിക്കാന്‍ വിധിയായി, തന്മൂലം മലയാള ഭാഷയില്‍ ലഭിക്കാവുന്ന പലതും ഒന്നൊന്നായി എനിക്കു കൈവിട്ടു പോയി എന്ന് പറഞ്ഞാല്‍ മതി,എന്നാല്‍ ഇതിനകം മലയാളത്തില്‍ നിരവധി ലേഖനങ്ങളും കഥകളും കവിതകളും ഗാനങ്ങളും എഴുതി പ്രസിദ്ധീകരിച്ചു, അതെനിക്ക് വലിയൊരു അഭിമാനമായി തോന്നി.  ഒപ്പം ചില ക്രൈസ്തവ (മലയാളം) പ്രസിദ്ധീകരണങ്ങളുടെ സിക്കന്ത്രാബാദ് ലേഖകകനായും പ്രവര്‍ത്തിച്ചു കൊണ്ടിരുന്നു.

ജോലി തേടി ഇരട്ട നഗരത്തില്‍ എത്തിയെങ്കിലും കുറേക്കാലം  ജോലി ലഭിക്കാതിരുന്നതും ഒപ്പം ചേച്ചിയുടെ നിര്‍ബന്ധത്തിനു വഴങ്ങി പഠനം തുടരുന്നതിനും തീരുമാനിച്ചു. ഒപ്പം പലയിടങ്ങളിലും  തുശ്ച  ശമ്പളത്തില്‍  ചെറിയ ചെറിയ ജോലികളില്‍ പ്രവേശിച്ചെങ്കിലും ഒരിടത്തും ഒരു സംതൃപ്തി കണ്ടെത്താന്‍ കഴിഞ്ഞില്ല. ലഭിച്ച ജോലിക്കൊപ്പം പഠനം തുടരുന്നതിനും, ബി. ഏ. പഠനം പൂര്‍ത്തിയാക്കുന്നതിനും കഴിഞ്ഞു.   അതുകൊണ്ടെന്തു ജോലി ലഭിക്കാനാ എന്ന ചിന്ത എന്നെ അലട്ടി തുടങ്ങി അങ്ങനെ വീണ്ടും പഠിക്കുന്നതിനുള്ള ഒരു പ്രേരണ ഞങ്ങളുടെ ഒരു കുടുംബ സുഹൃത്തിന്റെ (എന്നിലെ കലാ വാസന മണത്തറിഞ്ഞ) നിര്‍ദേശപ്രകാരവും ചേച്ചിയുടെ പ്രേരണയാലും പോസ്റ്റു ഗ്രാഡുവേറ്റു  ജേര്‍ണലിസം ഡിപ്ലോമാ കോഴ്സിനു ചേര്‍ന്നു. ക്ലാസ്സുകള്‍ ഇംഗ്ലീഷില്‍ ആയതിനാല്‍ തുടക്കത്തില്‍ അല്പം ബുദ്ധിമുട്ട് തോന്നിയെങ്കിലും പിന്നീട് ക്ലാസ്സുകള്‍ തികച്ചും ആനന്ദകരമായി അനുഭവപ്പെട്ടു. കാരണം എന്റെ വലിയൊരു അഭിലാഷം പൂര്‍ത്തീകരിക്കാന്‍ പോകുന്നല്ലോ എന്നോര്‍ത്തപ്പോള്‍  ഞാന്‍ തികച്ചും സന്തുഷ്ടനായി.

ഇംഗ്ലീഷ് ഭാഷാ പത്ര പ്രവര്‍ത്തനത്തില്‍ ഏര്‍പ്പെട്ടു കൊണ്ടിരുന്ന നിരവധി പേര്‍ ഗെസ്റ്റു ലെക്ചര്‍മാരായി വന്ന് നടത്തിയ ക്ലാസ്സുകള്‍ തികച്ചും വിജ്ജാനപ്രദങ്ങള്‍ ആയിരുന്നു. വിശേഷിച്ചും സ്വാതന്ത്ര്യയ സമര സേനാനിയും നിരവധി ഹിന്ദി ഇംഗ്ലീഷ് പത്രങ്ങളുടെ പത്രാധിപരും കോളംനിസ്റ്റും ആയ വി. എച്. ദേശായി  സാറിന്റെ ക്ലാസ്സുകള്‍ തികച്ചും പ്രായോഗികങ്ങള്‍ ആയിരുന്നു.  തന്റെ  സ്വാതന്ത്ര്യയ സമര സന്നാഹങ്ങളുടെ കഥകളും ഇടയ്ക്കിടെ നര്‍മം തുളുമ്പുന്ന ഭാഷയില്‍ പറഞ്ഞിരുന്നത് ശരിക്കും രസകരങ്ങളും വിജ്ജാനപ്രദങ്ങളും ആയിരുന്നു.

ഇതിനിടെ മറ്റൊരു  താല്‍ക്കാലിക ജോലി ലഭിക്കുകയും കുറേക്കാലം അത് പഠനത്തോടൊപ്പം തുടരുകയും ചെയ്തു.

പിന്നീട് പല ജോലികളിലും പ്രവേശിച്ചെങ്കിലും ഒന്നും തന്നെ ഒരു തൃപ്തി പ്രധാനം ചെയ്തില്ല. 

അങ്ങനെയിരിക്കെ Back to the Bible എന്ന ഒരു ക്രൈസ്തവ സംഘടനയില്‍ ജോലി സാദ്ധ്യത ഉണ്ടന്നറിഞ്ഞു ആപ്ലിക്കേഷന്‍ കൊടുത്തു അവിടെ ഒരു ജോലി തരമായി.  തുടക്കത്തില്‍ അതിലെ അക്കൌണ്ട്സ് ഡിപ്പാര്‍റ്റുമെന്റില്‍ ആയിരുന്നു ജോലി.  പിന്നീട് എന്റെ  ജേര്‍ണലിസത്തിലുള്ള താല്‍പ്പര്യവും വാസനയും കണക്കിലെടുത്ത് അവരുടെ പബ്ലിക്കേഷന്‍ ഡിവിഷനിലേക്ക് എനിക്കു മാറ്റം ലഭിക്കുകയും ചെയ്തു.  പിന്നീട് അതിന്റെ മാസികയുടെ "Confident Living" അസ്സോസ്സിയേറ്റ് എഡിറ്റര്‍ സ്ഥാനം ലഭിച്ചു.   ഇപ്പോള്‍ അതിന്റെ എഡിറ്റര്‍ ഇന്‍ചാര്‍ജു  ആയി തുടരുകയും ചെയ്യുന്നു.  

കടന്നു പോന്ന കടമ്പകള്‍ നിരവധി. എഴുതുവാനും നിരവധി, അതെല്ലാം ബ്ലോഗില്‍ ഒതുക്കുവാനും കഴിയിയാത്ത പരിസ്ഥിതി. വേദനാജനകമായ നിരവധി അനുഭവങ്ങള്‍ നാളിതുവരെയുള്ള വിവിധ പ്രവര്‍ത്തി മണ്ഡലങ്ങളില്‍ എനിക്കു നേരിടേണ്ടി വന്നിട്ടുണ്ടെങ്കിലും അവിടെയൊന്നും പതറാതെ മുന്നോട്ടു പോകുവാന്‍ ദൈവം എനിക്കു തുണയായി നിന്നു   ആ ദൈവത്തിനു  സ്തുതി അര്‍പ്പിച്ചുകൊണ്ടു ഈ വാക്കുകള്‍ ഇവിടെ ചുരുക്കുന്നു.  

ഒപ്പം എന്നെ ഇവിടം വരെ എത്തിച്ച ജേഷ്ഠ സഹോദരിക്കും സഹോദരനും അതിനു വഴിയായ മറ്റെല്ലാ ബന്ധുമിത്രാദികള്‍ക്കും സ്നേഹാദരവോടെ എന്റെ നന്ദി ഇവിടെ അര്‍പ്പിക്കുന്നു. 

ഇവിടെ വന്ന് എന്റെ കുറിപ്പുകള്‍  വായിക്കുകയും അഭിപ്രായങ്ങള്‍ അറിയിക്കുകയും ചെയ്ത എല്ലാവര്‍ക്കും ഒപ്പം നന്ദി.

  

Picture Credit. momsfocusonline.com/Googleimage

ഈ ശുഭ ദിനത്തില്‍ (June 22) ജന്മദിനാശംസകള്‍ നേരിട്ടും, ഫോണിലൂടെയും, മെയില്‍ വഴിയും സോഷ്യല്‍ വെബ്‌ സൈറ്റുകളിലൂടെയും അറിയിച്ച എല്ലാ സ്നേഹിതര്‍ക്കും സഹപ്രവര്‍ത്തകര്‍ക്കും വായനക്കാര്‍ക്കും എന്റെ ഹൃദയം നിറഞ്ഞ സ്നേഹ വന്ദനങ്ങള്‍

.എന്റെ കൂപ്പു കൈ.

വീണ്ടും കാണാം.

നിങ്ങളുടെ സ്വന്തം 

വളഞ്ഞവട്ടം പി വി ഏരിയല്‍ 

സിക്കന്ത്രാബാദ് 

സമാനമായ മറ്റു ചില ലിങ്കുകള്‍/ Few other related links:

My Heartfelt Thanks To All For Your Kind Words And Wishes O This Happy Occasion Personally And Through Mail, Phone, and Other Social Sites!
I Continue To Seek Your Valuable Prayers 
And Co-operation To Me And My Blogging Activities.
May God Bless You All.

Philip Verghese Ariel



web counter

Read More